ውዳሴ ማርያም ፡ ዘረቡዕ

ውዳ̣ሴሃ : ለእግ̮ዝእትነ : ማርያም : ድን̮ግል : ወላዲተ አም̮ላክ : ዘይት̮ነበ̣ብ : በዕለተ ረቡዕ

ኵሉ̣ : ሰራዊተ ሰማያት : ይብ̮ሉ : ብፅዕ̮ት : አን̮ቲ : ሰማይ : ዳግሚት : ዲበ ምድ̮ር : ኆኅተ ምሥ̮ራቅ : ማርያም : ድን̮ግል : ከብ̮ካብ : ንጹሕ : ወመር̮ዓ : ቅዱ̣ስ : ነጸ̣ረ : አብ : እም̮ሰማይ : ወኢረከበ : ዘከማኪ : ፈነ̣ወ : ዋሕዶ : ወተሰብ̮አ : እምኔ̣ኪ : ሰአሊ ፡ ለነ ፡ ቅድ̣ስ̮ት ፡፡

ኵሉ̣ : ትው̮ልድ̣ : ያስ̮ተበፅ̣ዑኪ : ለኪ : ለባሕቲትኪ : ኦ : እግ̮ዝእትነ : ወላዲተ አም̮ላክ : ተነበ̣ዩ : ላዕ̮ሌኪ : ዐቢያ̣ተ : ወመን̮ክራተ : ኦ : ሀገረ እግ̮ዚአብሔር : እስ̮መ ኮን̮ኪ : አን̮ቲ : ማኅ̮ደረ : ለፍሡ̣ሓን : ኵሎ̣ሙ : ነገሥ̮ተ ምድ̮ር : የሐው̣ሩ : በብር̮ሃንኪ : ወአሕዛብኒ : በጸዳልኪ : ኦ : ማርያም : ኵሉ̣ : ትው̮ልድ̣ : ያስ̮ተበፅ̣ዑኪ : ወይሰግ̣ዱ : ለዘተወል̮ደ : እምኔ̣ኪ : ወያዐብ̣ይ̣ዎ : ሰአሊ ፡ ለነ ፡ ቅድ̣ስ̮ት ፡፡

አን̮ቲ : ዘበአማን : ደመ̣ና : እን̮ተ አስ̮ተር̮አይኪ : ለነ : ማየ ዝናም : ትእ̮ምር̮ተ ዋሕዱ : ረሰ̣የኪ̣ : አብ : መን̮ፈስ ቅዱ̣ስ : ኀደረ : ላዕ̮ሌኪ : ወኃይ̮ለ ልዑል : ጸለ̣ለኪ̣ : ኦ : ማርያም : አማን : ወለድ̮ኪ : ቃለ : ወል̮ደ አብ : ዘይነብ̣ር : ለዓለም : መጽ̮አ : ወአድ̮ኀነ̣ነ: እም̮ኀጢአት : ዐቢይ̣ : ውእቱ : ክብ̮ር : ዘተውህ̮በ : ለከ : ኦ : ገብ̮ርኤል : መል̮አክ : ዜናዊ : ፍሡ̣ሐ ገጽ̣ : ሰበከ̣ : ለነ : ልደተ እግ̮ዚእ : ዘመጽ̮አ : ኀቤነ : ወአብ̮ሰርካ : ለማርያም : ድን̮ግል : ዘእን̮በለ ርስ̮ሐት : ወትቤላ : ተፈሥ̣ሒ : ኦ : ምልእ̮ተ ጸጋ̣ : እግ̮ዚአብሔር : ምስ̮ሌኪ : ሰአሊ ፡ ለነ ፡ ቅድ̣ስ̮ት ፡፡

ረከብ̮ኪ : ጸጋ̣ : መን̮ፈስ ቅዱ̣ስ : ኀደረ : ላዕ̮ሌኪ : ወኃይ̮ለ ልዑል : ጸለ̣ለኪ̣ : ኦ : ማርያም : አማን : ወለድ̮ኪ : ቅዱ̣ሰ : መድ̮ኅኑ : ለኵሉ̣ : ዓለም : መጽ̮አ : ወአድ̮ኀነነ̣ : ሰአሊ ፡ ለነ ፡ ቅድ̣ስ̮ት ፡፡

ግብ̮ረ ድን̮ግል : ይሴብ̣ሕ : ልሳ̣ንነ : ዮም : ንወድ̣ሳ̣ : ለማርያም : ወላዲተ አም̮ላክ : በእን̮ተ ዘተወል̮ደ : እምኔ̣ሃ : በሀገረ ዳዊት : እግ̮ዚእነ : ወመድ̮ኀኒነ : ኢየ̣ሱስ : ክ̮ርስ̮ቶስ : ንዑ : ኵል̣ክሙ : አሕዛብ : ናስ̮ተብ̮ፅዓ : ለማርያም : እስ̮መ ኮነት : እመ̣ : ድን̮ግለ : ወጽሙ̣ረ : ተፈሥ̣ሒ : ኦ : ድን̮ግል : ንጽሕ̮ት : እን̮ተ አል̮ባቲ : ርኵ̮ስ : ዘመጽ̮አ : ቃለ አብ : ወተሰብ̮አ : እምኔ̣ሃ : ተፈሥ̣ሒ : ኦ : ሙዳይ : እን̮ተ አል̮ባቲ : ነው̮ር : ፍጽ̣ም̮ት : ዘአል̮ባ : ርስ̮ሐት : ተፈሥ̣ሒ : ኦ : ገነ̣ት : ነባቢት : ማኅ̮ደሩ : ለክ̮ርስ̮ቶስ : ዘኮነ : ዳግማይ : አዳ̣ም : በእን̮ተ አዳ̣ም : ቀዳሚ : ብእሲ : ተፈሥ̣ሒ : ኦ : ፀዋሪቱ : ለዋሕድ : ለዘኢተፈል̮ጠ : እም̮ሕፅነ አቡሁ : ተፈሥ̣ሒ : ኦ : ከብ̮ካብ : ንጹሕ : ሥር̮ግው : በኵሉ̣ : ሥነ ስብ̮ሐት : መጽ̮አ : ወተሰብ̮አ : እምኔ̣ኪ : ተፈሥ̣ሒ : ኦ : ዕፀ ጳጦስ : እን̮ተ ኢያ̣ው̮ዐያ : እሳተ መለኮት ፡ ተፈሥ̣ሒ : ኦ : አመት : ወእም̣ : ድን̮ግል : ወሰማይ : ሰማያዌ : እን̮ተ ፆረት : በሥጋ : ዘይጼ̣ዐን : ዲበ ኪሩቤል : ወበእን̮ተዝ : ንት̮ፈሣ̣ሕ : ወንዘም̣ር : ምስ̮ለ መላእክ̮ት : ቅዱሳን : በፍሥ̣ሓ : ወበሐሤ̣ት : ወን̮በል : ስብ̮ሐት : ለእግ̮ዚአብሔር : በሰማያት : ወሰላም : በምድ̮ር : ሥም̮ረቱ : ለሰብ̮እ : እስ̮መ ኪያኪ : ሠም̮ረ : ዘሎቱ̣ : ክብ̮ር : ወስብ̮ሐት : ሰአሊ ፡ ለነ ፡ ቅድ̣ስ̮ት ፡፡

የዐቢ̣ : ክብ̮ራ : ለማርያም : እም̮ኵሎ̣ሙ : ቅዱ̣ሳን : እስ̮መ ድል̣ወ : ኮነት : ለተወክ̮ፎ ቃለ አብ : ዘይፈር̣ህዎ̣ : መላእክ̮ት : ወየአኵ̣ትዎ̣ : ትጉሃን : በሰማያት : ፆረቶ̣ : ማርያም : ድን̮ግል : በከር̮ሣ : ይእቲ : ተዐቢ̣ : እም̮ኪሩቤል : ወትፈደፍ̣ድ : እም̮ሱራፌል : እስ̮መ ኮነት : ታቦተ : ለአሐዱ : ዘእም̮ቅድ̣ስት : ሥላ̣ሴ : ዛቲ̣ : ይእቲ : ኢየ̣ሩሳሌም : ሀገሮሙ : ለነቢያት : ወማኅ̮ደረ ፍሥ̣ሓሆሙ : ለኵሎ̣ሙ : ቅዱ̣ሳን : ሕዝብ : ዘይነብ̣ር : ውስተ ጽልመት : ወጽላሎተ ሞት : ብር̮ሃን : ዐቢይ̣ : ሠረቀ : ላዕ̮ሌሆሙ : እግ̮ዚአብሔር : ዘየዐር̣ፍ : በቅዱ̣ሳኒሁ : ተሰብ̮አ : እምድን̮ግል : ለመድ̮ኀኒተ ዚአነ : ንዑ : ርእዩ : ዘን̮ተ : መን̮ክረ : ወዘም̣ሮ : ዘም̣ሩ : በእን̮ተ ምሥ̮ጢር : ዘተከሥ̮ተ : ለነ : እስ̮መ ዘኢይ̣ሰባ̣እ : ተሰብ̮አ : ቃል : ተደመ̣ረ : ወዘአል̮ቦ : ጥን̮ት : ኮነ : ቅድ̮መ : ወለዘአል̮ቦ : መዋዕል : ኮነ : ሎቱ̣ : መዋዕል : ዘኢይ̣ት̮ዐወ̣ቅ : ተከሥ̮ተ : ወዘኢይ̣ት̮ረአይ : ተርእ̮የ : ወል̮ደ እግ̮ዚአብሔር : ሕያው : ጥዩ̣ቀ : ኮነ : ሰብ̮አ : ኢየ̣ሱስ : ክ̮ርስ̮ቶስ : ዘትማልም : ወዮም : ወክ̣መ : ውእቱ : እስ̮ከ ለዓለም : አሐዱ : ህላ̣ዌ : ሎቱ̣ : ንስ̮ግድ : ወንሰብ̣ሕ : ሰአሊ ፡ ለነ ፡ ቅድ̣ስ̮ት ፡፡

ሕዝ̮ቅኤል : ነቢይ̣ : ኮነ : ስም̮ዐ : በእን̮ቲአሃ : ወይቤ : ርኢኩ : ኆኅተ : በምሥ̮ራቅ : ኅቱም : በዐቢይ̣ : መን̮ክር : ማኅተም : አል̮ቦ : ዘቦአ : ዘእን̮በለ እግ̮ዚአ ኃያ̣ላን : ቦአ : ውስ̮ቴታ : ወወፅ̮አ : ሰአሊ ፡ ለነ ፡ ቅድ̣ስ̮ት ፡፡

ኆኅትሰ̣ : ድን̮ግል : ይእቲ : እን̮ተ ወለደት : ለነ : መድ̮ኅነ : እም̮ድኅረ ወለደት : ኪያሁ : ነበረት : በድን̮ግል̣ና : ከመ ትካት : ቡሩክ : ውእቱ : ፍሬ ከር̮ሥኪ : ኦ : ወላዲተ እግ̮ዚእ : ዘመጽ̮አ : ወአድ̮ኀነነ̣ : እም̮እደ ጸላዒ : ዘአል̮ቦ : ምሕ̮ረት : አን̮ቲ : ፍጽ̣ም̮ት : ወቡርክ̮ት : ረከብ̮ኪ : ሞገሰ : በኀበ ንጉሠ ስብ̮ሐት : አም̮ላክ : ዘበአማን : ለኪ : ይደሉ̣ : ዕበይ : ወክብ̮ር : እምኵሎ̣ሙ : እለ̣ ይነብ̣ሩ : ዲበ ምድ̮ር : ቃለ አብ : መጽ̮አ : ወተሰብ̮አ : እምኔ̣ኪ : ወአን̮ሶሰወ : ምስ̮ለ ሰብእ : እስ̮መ መሐሪ : ውእቱ : ወመፍ̮ቀሬ ሰብ̮እ : አድ̮ኀነ : ነፍ̮ሳቲነ : በምጽ̮አቱ : ቅዱ̣ስ : ሰአሊ ፡ ለነ ፡ ቅድ̣ስ̮ት ፡፡