ውዳሴ ማርያም ፡ ዘዓርብ

ውዳ̣ሴሃ : ለእግ̮ዝእትነ : ማርያም : ድን̮ግል : ወላዲተ አም̮ላክ : ዘይት̮ነበ̣ብ : በዕለተ ዓር̮ብ

ቡርክ̮ት : አን̮ቲ : እም̮አንስ̮ት : ወቡሩክ : ፍሬ ከር̮ሥኪ : ኦ : ማርያም : ድን̮ግል : ወላዲተ አም̮ላክ : ዘእን̮በለ ርኵ̮ስ : ሠረቀ : ለነ : እምኔ̣ኪ : ፀሐየ ጽድ̮ቅ : ወአቅ̮ረበነ̣ : ታሕ̮ተ ክነፊሁ : እስ̮መ ውእቱ : ፈጠረነ̣ : ሰአሊ : ለነ : ቅድ̣ስ̮ት ::

ለኪ : ለባሕቲትኪ : ኦ : እግ̮ዝእትነ : ወላዲተ አም̮ላክ : እመ̣ ብር̮ሃን : አን̮ቲ : ናዐብ̣የኪ̣ : በስብ̮ሐት : ወበውዳ̣ሴ : ቡርክ̮ት : አን̮ቲ : ተዐብ̣ዪ : እም̮ሰማይ : ወትከብ̣ሪ : እም̣ድ̮ር : ወላዕ̮ለ ኵሉ̣ : ኅሊ̣ናት : መኑ̣ : ዘይክ̮ል : ነቢበ : ዕበየኪ : ወአል̮ቦ : ዘይመስ̣ል : ኪያኪ : ኦ : ማርያም : መላእክ̮ት : ያዐብ̣ዩኪ : ወሱራፌል : ይሴብ̣ሑኪ : እስ̮መ ዘይነ̣ብር : ዲበ ኪሩቤል : ወሱራፌል : መጽ̮አ : ወኀደረ : ውስ̮ተ ከር̮ሥኪ : መፍ̮ቀሬ ሰብ̮እ : አቅ̮ረበነ̣ : ኀቤሁ : ዘዚአነ : ሞተ : ነሥ̮አ : ወእን̮ቲአሁ : ሕይ̮ወተ : ወሀበነ : ዘሎቱ̣ : ክብ̮ር : ወስብ̮ሐት : ሰአሊ : ለነ : ቅድ̣ስ̮ት ::

ቡርክ̮ት : አን̮ቲ : ማርያም : ወቡሩክ : ፍሬ ከር̮ሥኪ : ኦ : ድን̮ግል : ወላዲተ አም̮ላክ : ምክ̮ሖን : ለደናግል : ዘእም̮ቅድ̮መ ዓለም : ህል̣ው : ተሰብ̮አ : እምኔ̣ኪ : ብሉየ መዋዕል : ወፅ̮አ : እም̮ከር̮ሥኪ : ሥጋነ : ነሥ̮አ : ወመን̮ፈሶ : ቅዱ̣ሰ : ወሀበነ̣ : ወረሰ̣የነ̣ : ዕሩያነ : ምስ̮ሌሁ : በብዝኀ ኂሩቱ : አን̮ቲ : ተዐብ̣ዪ : እም̮ብዙኃት : አንስ̮ት : እለ̣ ነሥ̮ኣ : ጸጋ̣ : ወክብ̮ረ : ኦ : ማርያም : ወላዲተ አም̮ላክ : ሀገር : መን̮ፈሳዊት : ዘኀደረ : ላዕ̮ሌሃ : እግ̮ዚአብሔር : ልዑል : እስ̮መ ዘይነብ̣ር : ዲበ ኪሩቤል : ወሱራፌል : በእራኅኪ : ሐቀፍ̮ኪዮ̣ : ወዘይሴሲ̣ : ለኵሉ̣ : ዘሥጋ : በብዝ̮ኀ ኂሩቱ : አኀዘ : አጥ̮ባተኪ : ወጠበወ : ሐሊበ : ዘውእቱ : አም̮ላክነ : መድ̮ኀኔ ኵሉ̣ : ይርዕየነ : እስ̮ከ ለዓለም : ንስ̮ግድ : ሎቱ̣ : ወንሰብ̣ሖ : እስ̮መ ውእቱ : ፈጠረነ̣ : ሰአሊ : ለነ : ቅድ̣ስ̮ት ::

ማርያም : ድን̮ግል : ሙዳየ ዕፍ̮ረት : ነቅ̮ዐ ፈል̮ፈለ ማየ ሕይ̮ወት : ፍሬ ከር̮ሣ : አድ̮ኀነ : ኵሎ̣ : ዓለመ : ወሰዐረ : እምኔ̣ነ : መር̮ገመ : ወገብ̮ረ : ሰላመ : ማዕ̮ከሌነ : በመስ̮ቀሉ : ወበትን̮ሣኤሁ : ቅድ̣ስ̮ት : አግ̮ብኦ : ለብእሲ : ዳግመ : ውስ̮ተ ገነ̣ት : ሰአሊ : ለነ : ቅድ̣ስ̮ት ::

ማርያም : ንጽሕ̮ት : ድን̮ግል : ወላዲተ አም̮ላክ : ማእምን̮ት : ሰአሊተ ምሕረት : ለውሉደ ሰብ̮እ : ሰአሊ : ለነ : ኀበ ክ̮ርስ̮ቶስ : ወል̮ድኪ : ይሥ̮ረይ : ኀጢአተነ : ሰአሊ : ለነ : ቅድ̣ስ̮ት ::

ማርያም : ድን̮ግል : ትጸር̣ሕ : በቤተ መቅ̮ደስ : ወትብ̮ል : የአም̣ር : እግ̮ዚአብሔር : ከመ አል̮ብየ : ዘአአም̣ር : ባዕ̮ደ : ወኢ : ምን̮ትኒ : ዘእን̮በለ ድም̮ፀ ቃሉ : ለመል̮አክ : ዘአብ̮ሰረኒ̣ : በክብ̮ር : ወይቤለኒ̣ : ሰላም : ለኪ : ኦ : ቅድ̣ስ̮ት : ድን̮ግል : ፆር̮ኪ : ዘኢይ̣ጸ̣ወ̣ር : አግመርኪ : ዘኢይ̣ትገመ̣ር : ወአል̮ቦ : ዘያገም̣ሮ : ምን̮ትኒ : ይበዝ̣ኅ : ውዳ̣ሴኪ : ኦ : ምልእ̮ተ ጸጋ̣ : በኵሉ̣ : ክብ̮ር : እስ̮መ ኮን̮ኪ : አን̮ቲ : ማኅ̮ደረ ቃለ አብ : አን̮ቲ : ውእቱ : መን̮ጦላዕ̮ት : ስፍሕ̮ት : እንተ ታስ̮ተጋብ̣ኦሙ : ለመሃይ̣ም̮ናን : ሕዝ̮በ ክ̮ርስ̮ቲያን : ወትሜህሮሙ : ሰጊደ : ለሥሉ̣ስ : ማሕየዊ : አን̮ቲ : ውእቱ : ዘጾር̮ኪ : ዐም̮ደ እሳት : ዘርእ̮የ : ሙሴ : ዘውእቱ : ወል̮ደ እግ̮ዚአብሔር : መጽ̮አ : ወኀደረ : ውስ̮ተ ከር̮ሥኪ : ኮን̮ኪ : ታቦቶ : ለፈጣሬ ሰማያት : ወምድ̮ር : ፆር̮ኪዮ̣ : በከር̮ሥኪ : ተሥ̮ዓተ̣ : አው̮ራኀ : አን̮ቲ : ማእምን̮ት : ለዘኢያ̣ገም̣ርዎ̣ : ሰማያት : ወምድ̮ር : ኮን̮ኪ : ተን̮ከተመ : ለዕር̮ገት : ውስ̮ተ ሰማይ : ብር̮ሃንኪ : የዐቢ̣ : እም̮ብር̮ሃነ ፀሐይ : አን̮ቲ : ውእቱ : ምሥ̮ራቅ : ዘወፅ̮አ : እምኔ̣ኪ : ኮከብ : ብሩህ : ዘነጸ̣ርዎ̣ : ቅዱ̣ሳን : በፍሥ̣ሓ : ወበሐሤ̣ት : ዘፈት̮ሐ : ላዕ̮ለ ሔዋን : ትለድ : በጻዕ̮ር : ወሕማም : አን̮ቲሰ̣ : ማርያም : ሰማዕ̮ኪ : ዘይብ̮ል : ተፈሥ̣ሒ : ኦ : ምልእ̮ተ ጸጋ̣ : ወለድ̮ኪ : ለነ : ንጉሠ : እግ̮ዚአ ኵሉ̣ : ፍጥ̮ረት : መጽ̮አ : ወአድ̮ኀነነ̣ : መሐሪ : ውእቱ : ወመፍ̮ቀሬ ሰብ̮እ : በእን̮ተዝ : ንዌድ̣ሰኪ̣ : በከመ ገብ̮ርኤል : መል̮አክ : እን̮ዘ ንብ̮ል : ቡርክ̮ት : አን̮ቲ : ማርያም : ወቡሩክ : ፍሬ ከር̮ሥኪ : ተፈሥ̣ሒ : ኦ : ምልእተ ጸጋ̣ : እግ̮ዚአብሔር : ምስ̮ሌኪ : ሰአሊ : ለነ : ቅድ̣ስ̮ት ::