ውዳሴ ማርያም ፡ ዘሰንበተ ክርስቲያን

ወዳ̣ሴሃ : ለእግ̮ዝእትነ : ማርያም : ድን̮ግል : ወላዲተ አም̮ላክ : ዘይት̮ነበ̣ብ : በዕለተ ሰን̮በተ ክ̮ርስ̮ቲያን : ቅድ̣ስ̮ት

ተሰመይ̮ኪ : ፍቅር̮ተ : ኦ : ቡርክ̮ት : እም̮አንስ̮ት : አን̮ቲ : ውእቱ : ዳግሚት : ቀመር : እን̮ተ ትሰ̣መ̣ይ : ቅድ̣ስ̮ተ ቅዱ̣ሳን : ወውስ̮ቴታ : ጽላ̣ተ ኪዳን : ዐሠ̣ርቱ : ቃላት : እለ̣ ተጽሕ̮ፋ : በአጻብዒሁ : ለእግ̮ዚአብሔር : ቀዲሙ : ዜነወነ̣ : በየው̮ጣ : እን̮ተ ይእቲ : ቀዳሜ ስሙ : ለመድ̮ኀኒነ : ኢየ̣ሱስ : ክ̮ርስ̮ቶስ : ዘተሰብ̮አ : እምኔ̣ኪ : ዘእን̮በለ ውላ̣ጤ : ወኮነ : ዐራቄ : ለሐዲ̣ስ : ኪዳን : በውሒዘ ደሙ : ቅዱ̣ስ : አን̮ጽሖሙ : ለመሃይ̣ም̮ናን : ወለሕዝ̮ብ : ንጹሓን : ሰአሊ : ለነ : ቅድ̣ስ̮ት ::

ወበእን̮ተዝ : ናዐብ̣የኪ̣ : ኵል̣ነ : ኦ : እግ̮ዝእትነ : ወላዲተ አም̮ላክ : ንጽሕ̮ት : ኵሎ̣ : ጊዜ : ንስእል : ወናን̮ቀዐዱ̣ : ኀቤኪ : ከመ ንር̮ከብ : ሣህ̮ለ : በኀበ መፍ̮ቀሬ ሰብ̮እ : ታቦት : በወር̮ቅ : ልቡጥ : እም̮ኵለ̣ሄ : ዘግቡር : እም̮ዕፅ : ዘኢይ̣ነቅ̣ዝ : ይት̮ሜሰ̣ል : ለነ : ዘእግ̮ዚአብሔር : ቃለ : ዘኮነ : ሰብ̮አ : ዘእን̮በለ ፍል̮ጠት : ወኢ : ውላ̣ጤ : መለኮት : ንጹሕ : ዘአል̮ቦ : ሙስና̣ : ዘዕሩይ : ምስ̮ለ አብ : ወቦቱ̣ : አብ̮ሠራ : ለንጽሕ̮ት : ዘእን̮በለ ዘር̮ዕ : ኮነ : ከማነ : በኪነ ጥበቡ : ቅዱ̣ስ : ዘተሰብ̮አ : እምኔ̣ኪ : ዘእን̮በለ ርኵ̮ስ : ደመ̣ረ : መለኮቶ : ሰአሊ : ለነ : ቅድ̣ስ̮ት ::

መቅ̮ደስ : ዘይኬል̣ልዋ̣ : ኪሩቤል : እለ̣ ሥዑላን : በሥዕ̮ለ እግ̮ዚአብሔር : ቃል : ዘተሰብ̮አ : እምኔ̣ኪ : ኦ : ንጽሕ̮ት : ዘእን̮በለ ውላ̣ጤ : ኮነ : ሠራዬ ኀጢአትነ : ወደም̮ሳሴ አበሳነ : ሰአሊ : ለነ : ቅድ̣ስ̮ት ::

አን̮ቲ : ውእቱ : መሶበ ወር̮ቅ : ንጹሕ : እን̮ተ ውስ̮ቴታ : መና̣ : ኅቡእ : ኅብስ̮ት : ዘወረደ : እም̮ሰማያት : ወሃቤ ሕይ̮ወት : ለኵሉ̣ : ዓለም : ሰአሊ : ለነ : ቅድ̣ስ̮ት ::

አን̮ቲ : ውእቱ : ተቅ̮ዋም : ዘወር̮ቅ : እን̮ተ ፆር̮ኪ : ማኅ̮ቶተ ጸዳል : ኵሎ̣ : ጊዜ : ዘውእቱ : ብር̮ሃኑ : ለዓለም : ብር̮ሃን : ዘእም̮ብር̮ሃን : ዘአል̮ቦ : ጥን̮ት : አም̮ላክ : ዘእም̮አም̮ላክ : ዘበአማን : ዘተሰብ̮አ : እምኔ̣ኪ : ዘእን̮በለ ውላ̣ጤ : ወበምጽ̮አቱ : አብ̮ርሀ : ላዕ̮ሌነ : ለእለ̣ ንነብ̣ር : ውስ̮ተ ጽል̮መት : ወጽላሎተ ሞት : ወአር̮ትዐ : እገሪነ : ውስ̮ተ ፍኖተ ሰላም : በምሥ̮ጢረ ጥበቡ : ቅዱ̣ስ : ሰአሊ : ለነ : ቅድ̣ስ̮ት ::

አን̮ቲ : ውእቱ : ማዕጠን̮ት : ዘወርቅ : እን̮ተ ፆር̮ኪ : ፍሕ̮መ እሳት : ቡሩክ : ዘነሥ̮ኣ : እመ̣ቅ̮ደስ : ዘይሠሪ̣ : ኀጢአተ : ወይደመስ̣ስ : ጌጋየ : ዝ : ውእቱ : ዘእግ̮ዚአብሔር : ቃል : ዘተሰብ̮አ : እምኔ̣ኪ : ዘአዕ̮ረገ : ለአቡሁ : ርእ̮ሶ : ዕጣነ : ወመሥ̮ዋዕ̮ተ : ሥሙረ : ሰአሊ : ለነ : ቅድ̣ስ̮ት ::

ተፈሥ̣ሒ : ኦ : ማርያም : ርግ̮ብ : ሠና̣ይ̮ት : ዘወለድ̮ኪ : ለነ : ዘእግ̮ዚአብሔር : ቃለ : አን̮ቲ : ውእቱ : ጽጌ : መዓዛ : ሠና̣ይ : እን̮ተ ሠረጸት : እም̮ሥር̮ወ እሤይ : ሰአሊ : ለነ : ቅድ̣ስ̮ት ::

በት̮ረ አሮን : እን̮ተ ሠረፀት : ዘእን̮በለ ተክ̮ል : ወኢሰቀይዋ̣ : ማየ : ከማሃ : አን̮ቲኒ : ኦ : ወላዲተ ክ̮ርስ̮ቶስ : አም̮ላክነ : ዘበአማን : ዘእን̮በለ ዘር̮ዕ : መጽ̮አ : ወአድ̮ኀነነ̣ : ሰአሊ : ለነ : ቅድ̣ስ̮ት ::

ለኪ : ይደሉ̣ : ዘእም̮ኵሎ̣ሙ : ቅዱ̣ሳን : ትስ̮አሊ : ለነ : ኦ : ምልእ̮ተ ጸጋ̣ : አን̮ቲ : ተዐብ̣ዪ : እም̮ሊቃነ ጳጳሳት : ወፈድ̮ፋደ : ትከብ̣ሪ : እም̮ነቢያት : ብኪ : ግር̮ማ ራእይ : ዘየዐቢ̣ : እም̮ግር̮ማ ሱራፌል : ወኪሩቤል : አን̮ቲ : በአማን : ምክ̮ሐ ዘመድነ : ወሰኣሊት : ሕይ̮ወተ : ለነፍ̮ሳቲነ : ሰአሊ : ለነ : ኀበ እግ̮ዚእነ : ወመድ̮ኀኒነ : ኢየ̣ሱስ : ክ̮ርስ̮ቶስ : ያጽንዐነ̣ : በርትዕት : ሃይ̮ማኖት : ውስ̮ተ አሚነ ዚአሁ : ይጸግ̣ወነ̣ : ሣህ̮ሎ : ወምሕ̮ረቶ : ይሥ̮ረይ : ኀጢአተነ : በብዝ̮ኀ ምሕ̮ረቱ : ሰአሊ : ለነ : ቅድ̣ስ̮ት ::

ይዌድ̣ስዋ̣ : መላእክ̮ት

ይዌድ̣ስዋ̣ : መላእክ̮ት : ለማርያም : በውስ̮ተ ውሳጤ መን̮ጦላዕት : ወይብ̮ልዋ̣ : በሐኪ : ማርያም : ሐዳ̣ስዩ : ጣዕዋ : ይቤላ : መል̮አክ : ለማርያም : ተወከፊዮ̣ : ለቃል : ኀቤኪ : ይመጽ̣እ : ወበማሕ̮ፀነ ዚአኪ : የኀድ̣ር : እፎ̣ : ቤተ ነዳይ : ኀደረ : ከመ ምስ̮ኪን : እም̮ሰማያት : ወረደ : ላዕ̮ሌሃ : ፈቲዎ : ሥነ ዚአሃ : ወተወል̮ደ : እምኔ̣ሃ : ወበሳድስ : ወር̮ኅ : ተፈነ̣ወ : ገብ̮ርኤል : መል̮አክ : እም̮ኀበ እግ̮ዚአብሔር : ኀበ አሐቲ̣ : ሀገር : ዘገሊላ : እን̮ተ ስማ : ናዝ̮ሬት : ኀበ ድን̮ግል : እን̮ተ ተፍኅ̮ረት : ለብእሲ : ዘስሙ : ዮሴፍ : ዘእም̮ቤተ ዳዊት : ወስማ : ለይእቲ : ድን̮ግል : ማርያም : ቦአ : መል̮አክ : ኀቤሃ : ወይቤላ : ተፈሥ̣ሒ : ፍሥ̣ሕ̮ት : ኦ : ምልእ̮ተ ጸጋ̣ : እግ̮ዚአብሔር : ምስ̮ሌኪ : ቡርክ̮ት : አን̮ቲ : እም̮አንስ̮ት : ወርእ̮ያ : ደን̮ገፀት : እም̮ቃሉ : ወሐለ̣የት : ወትቤ : እፎ̣ኑ : ከመ ዝኑ : እን̮ጋ : አም̣ኃ : ይት̮አም̣ኁ : ወይቤላ : መል̮አክ : ኢትፍ̮ርሂ : ማርያም : እስ̮መ ረከብኪ : ሞገሰ : በኀበ እግ̮ዚአብሔር : ወናሁ : ትፀን̣ሲ : ወትወል̣ዲ : ወል̮ደ : ወትሰም̣ዪዮ̣ : ስሞ : ኢየ̣ሱስ : ውእቱ : ዐቢይ̣ : ወይሰ̣መ̣ይ : ወል̮ደ እግ̮ዚአብሔር : ልዑል : ወይሁቦ : እግ̮ዚአብሔር : አም̮ላክ : መን̮በረ ዳዊት : አቡሁ : ወይነግ̣ሥ : ለቤተ ያዕቆብ : ለዓለም : ወአል̮ቦ : ማኅለቅ̮ት : ለመን̮ግሥ̮ቱ : ትቤሎ : ማርያም : ለመል̮አክ : እፎ̣ኑ : ይከው̣ነኒ̣ : ዝን̮ቱ : እን̮ዘ ኢየ̣አም̣ር : ብእሴ : እፎኑ : ይከው̣ነኒ : አውሥ̮ኣ : መል̮አክ : ወይቤላ : መን̮ፈሰ እግ̮ዚአብሔር : ቅዱ̣ስ : ይመጽ̣እ : ላዕ̮ሌኪ : ወኃይ̮ለ ልዑል : ይጼል̣ለኪ̣ : ዘኒ : ይት̮ወለ̣ድ : እምኔ̣ኪ : ቅዱ̣ስ : ውእቱ : ወይሰ̣መ̣ይ : ወል̮ደ እግ̮ዚአብሔር : ልዑል : ወናሁ : ኤል̮ሳቤጥኒ : እን̮ተ እም̮አዝ̮ማድኪ : ይእቲኒ : ፀን̮ሰት : ወረከበት : ወል̮ደ : በልኅ̮ቃቲሃ : ወበርስ̮ዓቲሃ : ወናሁ : ሳድስ : ዝን̮ቱ : ወር̮ኅ : ለእን̮ተ ይብ̮ልዋ̣ : መካ̣ን : እስ̮መ አል̮ቦ : ነገር : ዘይሰ̣ዐኖ : ለእግ̮ዚአብሔር : ትቤሎ : ማርያም : ለመል̮አክ : ነየ : አመቱ : እግ̮ዚአ ኵሉ̣ : ነየ : አመቱ : ይኩነኒ̣ : በከመ ትቤለኒ̣ : ይቤላ : መል̮አክ : ሰላም : ለኪ : ይቤላ : ገብ̮ርኤል : ሰላም : ለኪ : ማርያም : ድን̮ግል : ሰላም : ለኪ : ወላዲተ አም̮ላክ : ሰላም : ለኪ : ማርያም : ንጽሕ̮ት : ሰላም : ለኪ : ማርያም : ውድ̣ስ̮ት : ሰላም : ለኪ : ማኅ̮ደረ መለኮት : ሰላም : ለኪ : ደብ̮ተራ : ፍጽ̣ም̮ት : ሰላም : ለኪ : እኅ̮ተ መላእክ̮ት : ሰላም : ለኪ : ወእመ̣ ኵሉ̣ : ሕዝብ : ሰላም : ለኪ : እግ̮ዝእትነ : ማርያም : ሰላም : ለኪ : ሰላማዊት : ሰላም : ለኪ : ቀደ̣ሰኪ̣ : ለማኅ̮ደሩ : ልዑል : ሰላም : ለኪ : አብ̮ደረኪ̣ : ወኀረየኪ̣ : ከመ ትኩኒዮ̣ : ማኅ̮ደሮ : ሰላም : ለኪ : በአል̮ባሰ ወር̮ቅ : ዑጽፍ̮ት : ወሑብር̮ት : ሰላም : ለኪ : ክነፈ ርግ̮ብ : በብሩር : ዘግቡር : ሰላም : ለኪ : ወገበዋቲሃኒ : በሐመል̮ማለ ወር̮ቅ : ማርያም : ሥር̮ጉት : ሰላም : ለኪ : ኆኅተ ምሥ̮ራቅ : ወእሙ̣ : ለብር̮ሃን : ሰላም : ለኪ : ትበር̣ሂ : እም̮ፀሐይ : ወትት̮ሌዐሊ : እም̮አድ̮ባር : ሰላም : ለኪ : ማርያም : ኅሪት : ወክብር̮ት : ሰላም : ለኪ : ሰአሊ : ለነ : ኀበ እግ̮ዚእነ : ወመድ̮ኀኒነ : ኢየ̣ሱስ : ክ̮ርስ̮ቶስ : ከመ ያድ̮ኅነነ̣ : አመ ይመጽ̣እ : በስብ̮ሐተ አቡሁ : ምስ̮ለ መላእክ̮ቲሁ : ቅዱ̣ሳን : አመ ያቀው̣ም : አባግዐ : በየማኑ : ወአጣሌ : በጸጋሙ : ያቁመነ̣ : በየማኑ : ምስ̮ለ እስ̮ጢፋኖስ : ሰማዕ̮ት : ወዮሐን̣ስ : መጥ̮ምቅ : ወምስ̮ለ ኵሎ̣ሙ : ቅዱ̣ሳን : ወሰማዕ̮ት : ለዓለመ ዓለም : አሜን ::

አንቀጸ ብርሃን

አንቀጸ ብርሃን : ውዳ̣ሴ : ወግናይ : ለእመ̣ አዶናይ : ቅድ̣ስ̮ት : ወብፅዕ̮ት : ስብ̣ሕ̮ት : ወቡርክ̮ት : ክብር̮ት : ወልዕል̮ት : አን̮ቀጸ ብር̮ሃን : ማዐርገ ሕይ̮ወት : ወማኅ̮ደረ መለኮት : ቅድ̣ስ̮ተ ቅዱ̣ሳን : አን̮ቲ : ውእቱ : ኦ : እግ̮ዝእትነ : ወላዲተ አም̮ላክ : ማርያም : ድን̮ግል : ተሰመይ̮ኪ : ሥም̮ረተ አብ : ወማኅ̮ደረ ወል̮ድ : ወምጽ̮ላለ : ዘቅዱ̣ስ : መን̮ፈስ : ኦ : ቡርክ̮ት : እም̮ኵሉ̣ : ፍጥ̮ረት : አን̮ቲ : ውእቱ : ህየ̣ን̮ተ አርያም : ዘበሰማያት : ዘኮን̮ኪ : አርያመ : በዲበ ምድ̮ር : ብኪ : አስ̮ተማሰሉ : ቅዱ̣ሳን : ነቢያት : ካህናት : ወነገሥ̮ት : ገብ̮ሩ : ሎሙ : ቅድ̣ስ̮ተ ቅዱ̣ሳን : ወውስ̮ቴታ : ጽላ̣ተ ኪዳን : ወል̮ድኪ : ሣህ̮ሎ : ይክ̮ፍለነ : ሰአሊ : ለነ : ቅድ̣ስ̮ት ::

በእን̮ተ ተሠግ̣ዎቱ : ለወል̮ደ አም̮ላክ : እምኔ̣ኪ : ወብኪ : ቅሩባነ : ኮነ̣ : እም̣ድ̮ር : ለማኅ̮ደር : ውስ̮ተ አርያም : ብኪ : ወበስመ ወል̮ድኪ : ቅሩባነ : ኮነ̣ : ዐሠር̮ቱ : ቃላት : እለ̣ ተጽሕ̮ፋ : በአጻብዒሁ : ለእግ̮ዚአ ኵሉ̣ : ፍጥ̮ረት : ኀደረ : ወል̮ደ አም̮ላክ : ላዕ̮ሌኪ : አብ : በየማኑ : ከደነኪ̣ : ወቅዱ̣ስ : መን̮ፈስ : ጸለ̣ለኪ̣ : ወኃይ̮ለ ልዑል : አጽ̮ንዐኪ̣ : ወኢየ̣ሱስ : ለብ̮ሰ : ሥጋ ዚአኪ : ከል̮ሐ : ወይቤ : ዘጸም̮ዐ : ይም̮ጻእ : ኀቤየ : ወይስ̮ተይ : በከመ ይቤ : መጽ̮ሐፍ : አፍ̮ላገ ማየ ሕይ̮ወት : ዘይውሕዝ : እም̮ከር̮ሡ : ወል̮ድኪ : ሣህ̮ሎ : ይክ̮ፍለነ̣ : ሰአሊ : ለነ : ቅድ̣ስ̮ት ::

ቀዲሙ : ዜነወነ̣ : አብ : በየው̮ጣ : እን̮ተ ይእቲ : ዐሠ̣ር̮ቱ : ቃላት : እለ̣ ተጽሕ̮ፋ : በአጻብዒሁ : ለእግ̮ዚአብሔር : ወመሀረነ̣ : ወል̮ድከ : እግ̮ዚእነ : ወመድ̮ኀኒነ : ኢየሱስ : ክ̮ርስ̮ቶስ : ከመ አን̮ተ : ባሕ̮ቲትከ : አቡሁ : ሎቱ̣ : ወውእቱ : ባሕ̮ቲቱ : ወል̮ድ : ለከ : ከመዝ : ነአም̣ን : ዘአል̮ቦቱ̣ : እም̣ : በሰማያት : ወአብ : በዲበ ምድ̮ር : ዘወረደ : እም̮ሰማያት : እን̮ዘ አል̮ቦ : ዘየአም̣ር : ምጽ̮አቶ : ዘእን̮በለ አቡሁ : ባሕ̮ቲቱ : ወጰራቅሊጦስ : መን̮ፈሰ ጽድ̮ቅ : ኀደረ : ውስ̮ተ ከር̮ሥኪ : ወፆር̮ኪዮ̣ : ተሥ̮ዐተ̣ : አው̮ራኀ : ተፈሥ̣ሑ : ሰማያት : ወተሐሥ̮የት : ምድ̮ር : በልደቱ : ለወል̮ድኪ : መል̮አክ : ዜነወ : ፍሥ̣ሓ : ወሐራ ሰማይ : ሰብ̣ሑ : እን̮ዘ ይብ̮ሉ : ስብ̮ሐት : ለእግ̮ዚአብሔር : በሰማያት : ወሰላም : በምድ̮ር : ለዕጓለ እመሕያው : ሥም̮ረቱ : ወኖሎት : በቤተ ልሔም : አን̮ከሩ : እም̮ዘርእ̮ዩ : ወሰም̮ዑ : ሰብ̮አ ሰገል : ርእዮሙ : ኮከበ : መጽ̮ኡ : እም̮ርሑቅ : ብሔር : ከመ ይስ̮ግዱ : ለወል̮ድኪ : ወይግ̮ነዩ : ለኪ : ውእቱ : ኮከብ : ዘመር̮ሖሙ : እም̣ሥ̮ራቅ : ወአብ̮ጽሖሙ : እስ̮ከ ቤተ ልሔም : ቆመ : መል̮ዕል̮ቴኪ : ኀበ ሀሎኪ : አን̮ቲ : ምስ̮ለ ሕፃንኪ : ወርእዮሙ : እል̣ክ̮ቱ : መሰግ̣ላን : ተፈሥ̣ሑ : ዐቢየ̣ : ፍሥ̣ሓ : ቦኡ : ኀቤሁ : ወቆሙ : ቅድ̮ሜሁ : ወወድ̮ቁ : ዲበ ምድ̮ር : ወሰገዱ : ሎቱ̣ : ወአር̮ኀዉ : መዛግብ̮ቲሆሙ : ወአብኡ : ሎቱ̣ : አም̣ኃ : ወር̮ቀ : ከር̮ቤ : ወስኂነ : ወይቤሉ : አም̣ኃ : አባእ̮ነ : ለከ : ዕጣነ : አቅ̮ረብ̮ነ : ለከ : እም̮ዚአከ : ለክቡር : ስምከ : ኦ : አም̮ላክነ : በእን̮ተ ኀጢአተ ሕዝ̮ብከ : ከመ ትት̮ወከፍ : ስእ̮ለቶሙ : ወመሥ̮ዋዕ̮ቶሙ : ዘመጻእ̮ከ : ከመ ትሥ̮ረይ : ሎሙ : ኀጢአቶሙ : ወል̮ድኪ : ሣህ̮ሎ : ይክ̮ፍለነ : ሰአሊ : ለነ : ቅድ̣ስ̮ት ::

አን̮ቲ : ውእቱ : ንጽሕ̮ት : እም̮ንጹሓን : ድን̮ግል : ኅሪት : ዘነበር̮ኪ : ውስ̮ተ ቤተ መቅ̮ደስ : ከመ ታቦት : ዘግቡር : እም̮ዕፅ : ዘኢይ̣ነቅ̣ዝ : ሥር̮ግው : በወር̮ቅ : ንጡፍ : ወልቡጥ : በዕን̮ቈ ባሕ̮ርይ : ዘየኀቱ̣ : ዘብዙኅ : ሤጡ : ከመዝ : ነበር̮ኪ : ውስ̮ተ ቤተ መቅ̮ደስ : ወመላእክ̮ት : ያመጽ̣ኡ : ወት̮ረ : ሲሳየኪ : ከመዝ : ነበር̮ኪ : ዐሠ̣ር̮ተ : ወክል̮ኤተ̣ : ዓመተ : እን̮ዘ ትት̮ናዘ̣ዚ : እም̮ኀበ መላእክ̮ት : ስቴኪኒ : ስቴ ሕይ̮ወት : ውእቱ : ወመብ̮ልዕኪኒ : ኅብስ̮ት : ሰማያዊ : ዳዊት : አቡኪ : ዘመ̣ረ : በመሰን̮ቆ : ወሐለየ : በመዝ̮ሙር : እን̮ዘ ይብ̮ል : በመን̮ፈሰ ትን̮ቢት : ስምዒ : ወለት̣የ : ወርእዪ : ወአጽ̮ምዒ : እዝ̮ነኪ : ርስዒ : ሕዝ̮በኪ : ወቤተ አቡኪ : እስ̮መ ፈተወ : ንጉሥ : ሥነኪ : እስ̮መ ውእቱ : እግ̮ዚእኪ : ወሎቱ̣ : ትሰግ̣ዲ : ወል̮ድኪ : ሣህ̮ሎ : ይክ̮ፍለነ̣ : ሰአሊ : ለነ : ቅድ̣ስ̮ት ::

ገብ̮ርኤል : መል̮አክ : እመ̣ላእክ̮ት : ንጹሓን : ዘአል̮ቦ : ሙስና̣ : እመ̣ላእክ̮ት : ቀደ̣ምት : ዘይቀው̣ም : ቅድ̮መ እግ̮ዚአ ኵሉ̣ : አብ̮ሠረኪ̣ : ወይቤለኪ̣ : ተፈሥ̣ሒ : ፍሥ̣ሕ̮ት : እግ̮ዚአብሔር : ምስ̮ሌኪ : ቡርክ̮ት : አን̮ቲ : እም̮አንስ̮ት : ረከብ̮ኪ : ሞገሰ : በኀበ እግ̮ዚአ ኲሉ̣ : ወናሁ : ትፀን̣ሲ : ወትወል̣ዲ : ወል̮ደ : ወትሰም̣ዪዮ̣ : ስሞ : ኢየ̣ሱስ : ውእቱ : ዐቢይ̣ : ወይሰመ̣ይ : ወል̮ደ ልዑል : ወይሁቦ : እግ̮ዚአብሔር : አም̮ላክ : መን̮በረ ዳዊት : አቡሁ : ወይነግሥ̣ : ለቤተ ያዕቆብ : ለዓለም : ወአል̮ቦ : ማኅለቅ̮ት : ለመን̮ግሥ̮ቱ : መን̮ፈስ ቅዱ̣ስ : ይመጽ̣እ : ላዕ̮ሌኪ : ወኃይ̮ለ ልዑል : ይጼል̣ለኪ̣ : ዘኒ : ይት̮ወለ̣ድ : እምኔ̣ኪ : ቅዱ̣ስ : ውእቱ : ወይሰ̣መ̣ይ : ወል̮ደ እግ̮ዚአ ኵሉ̣ : ዘተወል̮ደ : እምኔኪ : ወልድ̮ኪ ፡ ሣህ̮ሎ : ይክ̮ፍለነ̣ : ሰአሊ : ለነ : ቅድ̣ስ̮ት ::

አን̮ቲ : ውእቱ : ዘኮን̮ኪ : ጽር̮ሐ ቅድ̣ሳት : ወመቅ̮ደሰ ቅድ̣ስ̮ተ ቅዱ̣ሳን : ወመን̮ጦላዕ̮ተ ብር̮ሃን : ወመን̮በረ ስብ̮ሐት : ዘኢይ̣ተ̣ረጐ̣ም : አስ̮ተማሰል̮ናኪ : ኦ : ቅድ̣ስ̮ት : ማርያም : በመቅ̮ደሰ ቅድ̣ስ̮ተ ቅዱ̣ሳን : በእን̮ተ ቅዱ̣ስ : መን̮ፈስ : ዘመጽ̮አ : ላዕ̮ሌኪ : ወኃይ̮ለ ልዑል : ጸለ̣ለኪ̣ : ወመን̮ጦላዕተ ብር̮ሃንሰ : በእን̮ተ ዘተሰወ̣ረ : ቃለ አብ : ኢየ̣ሱስ : ክ̮ርስ̮ቶስ : መድ̮ኀኒነ : ውስ̮ተ ከር̮ሥኪ : እግ̮ዚአ ኵሉ̣ : ዘመል̮ዕል̮ት : ዘይሴብ̣ሕዎ̣ : መላእክ̮ት : ወሊቃነ መላእክ̮ት : መናብር̮ት : ወሥል̮ጣናት : አጋዕዝ̮ት : ወኀይ̮ላት : ሊቃናት : ወመኳንን̮ት : ወሶበ ወለድ̮ኪ : ወል̮ደኪ : በዲበ ምድ̮ር : በውስ̮ተ ጎል : ከለ̣ሉኪ : ኪሩቤል : እለ̣ ብዙኃት : አዕይ̣ን̮ቲሆሙ : ወሱራፌል : እለ̣ ስድ̣ስቱ : ክነፊሆሙ : ወደመ̣ናተ ብር̮ሃን : ዖዱኪ : ሊቃነ መላእክ̮ት : ወሰራዊተ መላእክ̮ት : ወሐራ ሰማይ : ቆሙ : ቅድ̮ሜኪ : በፍር̮ሀት : ወበረዐድ : ወበህየ̣ : በካልዕ : ስብ̮ሐት : ወደ̣ሱኪ : ኪሩቤል : ወሱራፌል : ዘኢኮነ : እም̮ስብ̮ሐቲሆሙ : ዘውስተ ሰማያት : ወኢ : እምስብሐቲሆሙ : ዘትካት : ወሶበ ርእ̮ዩ : እግ̮ዚኦሙ : ዘአስ̮ተጋብአ : ኵሎ : ፍጥ̮ረታተ : እን̮ዘ ይነብ̣ር : ውስ̮ተ ሕፅ̮ንኪ : ወዘይሴሲ̣ : ለኵሉ̣ : ፍጥ̮ረት : ይጠቡ̣ : ሐሊበኪ : ከመ ሕፃን : ኀሠሥዎ̣ : ውስ̮ተ አርያም : ወበህየ̣ : ረከብዎ̣ : ምስ̮ለ አቡሁ : ወመን̮ፈስ ቅዱ̣ስ : ከመ ትካት : ወሶበ ርእዩ : ትሕ̮ትናሁ : ለእግ̮ዚእነ : አል̮ዐሉ : አዕይ̣ን̮ቲሆሙ : ላዕ̮ለ : ውስ̮ተ አርያም : ሰፍ̮ሑ : ክነፊሆሙ : ወሰብ̣ሑ : ለእግ̮ዚኦሙ : እን̮ዘ ይብ̮ሉ : ስብ̮ሐት : ለከ : እግ̮ዚአ ኵሉ̣ : በሰማያት : ወዓዲ : ርእ̮ዩኪ : በውስ̮ተ በአት̣ : ለኪ : ለባሕቲትኪ : ምስ̮ለ ሕፃንኪ : ወይቤሉ : ሰላም : በዲበ ምድ̮ር : ወሶበ ርእ̮ዩ : እን̮ዘ ይለብ̣ስ : ሥጋ ዚአነ : ዘነሥ̮አ : እምኔ̣ኪ : ሰገዱ : እን̮ዘ ይብ̮ሉ : ለዕጓለ እመሕያው : ሠም̮ሮ : ዳዊት : ነቢይ̣ : ተነበየ : በመዝ̮ሙር : እን̮ዘ ይብ̮ል : እም̮ሰማይ : ሐወ̣ጸ : እግ̮ዚአ ኵሉ̣ : ወእም̮ድል̣ው : ጽር̮ሐ መቅ̮ደሱ : ወርእ̮የ : ኵሎ̣ : ደቂቀ ዕጓለ እመሕያው : ፈተወ : ንጉሥ : ሥነኪ : ወይቤ : ዛቲ̣ : ይእቲ : ምዕ̮ራፍየ : ለዓለም : ዝየ : አኀድ̣ር : እስ̮መ ኀረይ̮ክዋ̣ : ወል̮ድኪ : ሣህ̮ሎ : ይክ̮ፍለነ̣ : ሰአሊ : ለነ : ቅድ̣ስ̮ት ::

አስ̮ተማሰል̮ናኪ : ቅድ̣ስ̮ት : ወብፅዕ̮ት : ስብ̣ሕ̮ት : ወቡርክ̮ት : ክብር̮ት : ወልዕል̮ት : በመሶብ : ዘወር̮ቅ : ዘውስ̮ቴታ : ኅብስ̮ተ ሕይ̮ወት : ዘወረደ : እም̮ሰማያት : ወሃቤ ሕይ̮ወት : ለኵሉ̣ : ዘየአም̣ን : ኪያሁ : ወይበል̣ዕ : እምኔ̣ሁ : በአሚን : ወበልብ̣ : ሥሙር : ምስ̮ለ እለ̣ በየማኑ : ወል̮ድኪ : ሣህ̮ሎ : ይክ̮ፍለነ̣ : ሰአሊ : ሰአሊ : ለነ : ቅድ̣ስ̮ት ::

አን̮ቲ : ውእቱ : ተቅ̮ዋም : ዘወር̮ቅ : ዘኢገብ̮ራ : እደ ኬንያ : ዘሰብ̮እ : ወኢያ̣ኀት̣ዉ : ውስ̮ቴታ : ማኅ̮ቶተ : አላ̣ : ለሊሁ : ብር̮ሃነ አብ : ብር̮ሃን : ዘእም̮ብር̮ሃን : መጽ̮አ : ኀቤኪ : ወነበረ : መል̮ዕል̮ቴኪ : ወአብ̮ርሀ : በመለኮቱ : ውስ̮ተ ኵሉ̣ : አጽ̮ናፈ ዓለም : ሰደደ : ጽል̮መተ : እምላዕ̮ለ ሰብ̮እ : ወአድ̮ኀነነ : በቃሉ : ማሕየዊ : እን̮ዘ ይብ̮ል : አነ : ውእቱ : ብር̮ሃኑ : ለዓለም : እመኑ : በብር̮ሃኑ : ወአን̮ሶስዉ : እን̮ዘ ብክሙ : ብር̮ሃን : ወል̮ድኪ : ሣህ̮ሎ : ይክ̮ፍለነ̣ : ሰአሊ : ለነ : ቅድ̣ስ̮ት ::

እግ̮ዚአ ኵሉ̣ : ዘእም̮እግዚአ ኵሉ̣ : ብር̮ሃን : ዘእም̮ብር̮ሃን : እግ̮ዚእ : ዘበአማን : ዘእም̮እግ̮ዚአ ኵሉ̣ : ዘበአማን : ዘተወል̮ደ : ወአኮ : ዘተገብ̮ረ : ኅቡር : ህላ̣ዌሁ : ምስ̮ለ አቡሁ : ዘቦቱ̣ : ኵሉ̣ : ኮነ : ዘበሰማይኒ : ወዘበምድ̮ርኒ : ዘበእን̮ቲአነ : ለሰብ̮እ : ወበእን̮ተ መድ̮ኀኒትነ : ወረደ : ወተሰብ̮አ : ወተሠገወ : እማ̣ርያም : እም̮ቅድ̣ስ̮ት : ድን̮ግል : ወበምጽ̮አቱ : አብ̮ርሀ : ላዕ̮ሌነ : ወዜነወነ̣ : ትፍ̮ሥሕ̮ተ : ወሐሤተ : ወአቅ̮ረበነ̣ : ኀበ አቡሁ : ወመር̮ሐነ̣ : ፍኖተ ሕይ̮ወት : ወወሀበነ̣ : ሕይ̮ወተ : ዘለዓለም : በአሚነ ዚአሁ : ኢሳይያ̣ስ : ነቢይ̣ : እም̮ትእ̮ዛዙ : ለኢየ̣ሱስ : አን̮ከረ : በትን̮ቢት : ወይቤ : ብር̮ሃን : ትእ̮ዛዝከ : በዲበ ምድ̮ር : ዘካ̣ርያስ : ካህን : አረጋዊ : ጻድቅ : ወንጹሕ : ዘይገብር : ትእ̮ዛዞ : ለእግ̮ዚአ ኵሉ̣ : አን̮ከረ : ወተደመ̣ : ከሠተ : አፉሁ : ወይቤ : በሣህ̮ሉ : ወበምሕ̮ረቱ : ለአም̮ላክነ : ለዘሐወ̣ጸነ̣ : እም̮አርያም : ወሠረቀ : ከመ ያር̮እዮ̣ሙ : ብር̮ሃኖ : ለእለ̣ ይነብ̣ሩ : ውስ̮ተ ጽል̮መት : ወጽላሎተ ሞት : ወአር̮ትዐ : እገሪነ : ውስ̮ተ ፍኖተ ሰላም : ከመ ይም̮ሐረነ̣ : ወል̮ድኪ : ሣህ̮ሎ : ይክ̮ፍለነ̣ : ሰአሊ : ለነ : ቅድ̣ስ̮ት ::

ናስ̮ተማስ̣ለኪ̣ : ኦ : እግ̮ዝእትነ : ማርያም : በማዕጠን̮ት : ዘወር̮ቅ : ዘውስ̮ተ እደዊሆሙ : ለሊቃነ ካህናት : ሰማያውያን : እለ̣ ይከው̣ኑ : ጸሎተ ኵሎ̣ሙ : ቅዱ̣ሳን : ወመሀይ̣ም̮ናን : እም̮ዲበ ምድ̮ር : በውስ̮ተ ማዕጠን̮ቶሙ : ከማሁ : በስእ̮ለተ ስምኪ : ያዐር̣ጉ : ስእ̮ለቶሙ : ለደቂቀ ዕጓለ እመሕያው : ውስ̮ተ ማኅ̮ደረ ሥሉ̣ስ : ቅዱ̣ስ : አብ : ወወል̮ድ : ወመን̮ፈስ ቅዱ̣ስ : ወታስ̮ተስ̮ርዪ : ኀጢአተ ሕዝ̮ብኪ : ተበው̣ሐ : ለኪ : እም̮አብ : ወወል̮ድ : ወመን̮ፈስ ቅዱ̣ስ : ከመ ትኩኒ : ተን̮ከተመ : ለውሉደ ሰብ̮እ : ለሕይ̮ወት : ዘለዓለም : ለኪ : ይደሉ̣ : ከመ ትኩኒ : መድ̮ኀኒቶሙ : ለመሀይ̣ም̮ናን : ሕዝ̮ብኪ : ኦ : መድ̮ኀኒተ ኵሉ̣ : ዓለም : ወል̮ድኪ : ሣህ̮ሎ : ይክ̮ፍለነ̣ : ሰአሊ : ለነ : ቅድ̣ስ̮ት ::

አን̮ቲ : ውእቱ : ዕፅ : ቡሩክ : ዕፀ ሕይ̮ወት : ወዕፀ መድ̮ኀኒት : ህየ̣ን̮ተ ዕፀ ሕይ̮ወት : ዘውስ̮ተ ገነ̣ት : ዘኮን̮ኪ : ዕፀ ሕይ̮ወት : በዲበ ምድ̮ር : ፍሬኪኒ : ፍሬ ሕይ̮ወት : ውእቱ : ወዘበል̮ዐ : እምኔ̣ሁ : ሕይ̮ወተ : ዘለዓለም : የሐዩ̣ : ጽጌ : አስ̮ተር̮አየ : እምኔ̣ኪ : ዘሠና̣የ : መዐዛ : ይምዕዝ : በኀበ እለ̣ የአም̣ርዎ̣ : ውስ̮ተ ኵሉ̣ : አጽ̮ናፈ ዓለም : ዘበእን̮ቲአሁ : ተነበየ̣ : ዳዊት : በመዝ̮ሙር : እን̮ዘ ይብ̮ል : ከር̮ቤ : ወሚዓ : ወሰሊክ : እምነ̣ አል̮ባስኪ : ሰሎሞን : አቡኪ : ተነበየ̣ : ወይቤ : ጼና አን̮ፍኪ : ከመ ጼና ስኂን : ገነ̣ት : ዕጹት : እኅትየ : መርዓት : ገነ̣ት : ዕጹት : ዐዘቅ̮ት : ኅትም̮ት : ፍናወ ዚአኪ : ገነ̣ት : ምስ̮ለ ፍሬ አቅማሕ : ቆዕ : ምስ̮ለ ናርዶስ : ናርዶስ : ዘምስ̮ለ መጽርይ : ቀጺመታት : ወቀናንሞስ : ምስ̮ለ ኵሉ̣ : ዕፀወ ሊባኖስ : ከር̮ቤ : ወዐልው : ምስ̮ለ ኵሉ̣ : መቅ̮ድመ ዕፍ̮ረታት : ነቅ̮ዐ ገነት : ዐዘቅ̮ተ ማየ ሕይ̮ወት : ዘይውሕዝ : እም̮ሊባኖስ : ወል̮ድኪ : ሣህ̮ሎ : ይክ̮ፍለነ̣ : ሰአሊ : ለነ : ቅድ̣ስ̮ት ::

በት̮ረ አሮን : እን̮ተ ሠረጸት : ዘእን̮በለ ተክ̮ል : ወኢሰቀይዋ̣ : ማየ : በቤተ መቅደስ : ወረሰ̣ያ : ድሉ̣ተ : ለካህናት : ከማሃ : አን̮ቲኒ : ነበር̮ኪ : ውስ̮ተ ቤተ መቅ̮ደስ : በቅድ̣ስና̣ : ወበንጽ̮ሕ : ወወፃእ̮ኪ : እም̮ቤተ መቅ̮ደስ : በክብ̮ር : ወበዐቢይ̣ : ፍሥ̣ሓ : ወሠረጸ : እምኔ̣ኪ : ፍሬ ሕይ̮ወት : ዘበአማን : እግ̮ዚእነ : ወመድ̮ኀኒነ : ኢየ̣ሱስ : ክ̮ርስ̮ቶስ : ኦ : ቅድ̣ስት : ዘእን̮በለ ሩካቤ : ረከብ̮ኪ : ወል̮ደ : በከመ ተጠየ̣ቂ̣ዮ̣ : ለመል̮አክ : ወይቤለኪ̣ : መን̮ፈስ ቅዱ̣ስ : ይመጽ̣እ : ላዕ̮ሌኪ : ወኃይ̮ለ ልዑል : ይጼል̣ለኪ̣ : ወል̮ድኪ : ሣህ̮ሎ : ይክ̮ፍለነ̣ : ሰአሊ : ለነ : ቅድ̣ስ̮ት ::

ለኪ : ይደሉ̣ : ለአግ̮ብር̮ትኪ : ወለአእማትኪ : ትስ̮አሊ : ለነ : ኀበ ወል̮ድኪ : ለእለ̣ አመነ̣ : በስመ ወል̮ድኪ : ኦ : ምልእ̮ተ ጸጋ̣ : ኦ : ሙሓዘ ፍሥ̣ሓ : ፈድ̮ፋደ : ብኪ : ግር̮ማ ራእይ : ዘየዐቢ̣ : እም̮ኪሩቤል : እለ̣ ብዙኃት : አዕይ̣ን̮ቲሆሙ : ወሱራፌል : እለ̣ ስድ̣ስቱ : ክነፊሆሙ : እል̣ክ̮ቱ : ይከድ̣ኑ : ገጾ̣ሙ : ወእገሪሆሙ : በአር̮አያ ትእ̮ምር̮ተ መስ̮ቀል : ከመ ይድ̮ኀኑ : እም̮እሳት : ዘይወፅ̣እ : እመ̣ለኮተ ወል̮ድኪ : አን̮ቲሰ̣ : ኮን̮ኪ : ማኅ̮ፈደ : ለመለኮት : ወኢያ̣ው̮ዐየኪ̣ : እሳተ መለኮት : ጾር̮ኪ : ነበል̮ባለ እሳት : ወኢያ̣ው̮ዐየኪ̣ : ነበል̮ባለ መለኮት : ተመሰ̣ልኪ : ዕፀ ጳጦስ : ዘርእ̮የ : ሙሴ : በነደ̣ እሳት : ወዕፀታ : ኢውዕ̮የ : ከማሁ : ኢያ̣ው̮ዐየኪ̣ : እግ̮ዚአ ኀይ̮ላት : ዘኵለ̣ን̮ታሁ : እሳት : ፍጹ̣ም : አን̮ቲ : በአማን : ዘኮን̮ኪ : ምክ̮ሐ : ለዘመደ ክ̮ርስ̮ቲያን : ወብኪ : ቅሩባነ : ኮነ̣ : እም̣ድ̮ር : ለማኅ̮ደር : ውስ̮ተ አርያም : በእን̮ተ ተሠግ̣ዎቱ : ለወል̮ደ አም̮ላክ : እምኔ̣ኪ : ወሰአሊት : ለነፍ̮ሳቲነ : ሕይ̮ወተ : ኦ : ጸጋ̣ዊተ ምሕ̮ረት : ለእለ̣ የአም̣ኑ : በጸሎታ : ሰአሊ : ለነ : ኀበ እግ̮ዚእነ : ወመድ̮ኀኒነ : ኢየ̣ሱስ : ክ̮ርስ̮ቶስ : ያጽ̮ንዐነ̣ : በርትዕ̮ት : ሃይ̮ማኖት : ውስ̮ተ አሚነ ዚአሁ : ወዘአቡሁ : ወዘቅዱ̣ስ : መን̮ፈሱ : ይጸግ̣ወነ : ሣህ̮ሎ : ወምሕረቶ : ይስ̮ረይ : ኀጢአተነ : በብዝ̮ኀ ምሕ̮ረቱ : ስብ̮ሐት : ለኪ : ኦ ፡ ወላዲተ እግ̮ዚአ ኵሉ̣ : አኰቴት : ወክብ̮ር : ለአብ : ወወል̮ድ : ወመን̮ፈስ ቅዱ̣ስ : ይእዜኒ : ወዘል̮ፈኒ : ወለዓለመ ዓለም : አሜን : ወል̮ድኪ : ሣህ̮ሎ : ይክ̮ፍለነ̣ : ሰአሊ : ለነ : ቅድ̣ስ̮ት ::