ውዳሴ ማርያም ፡ ዘሠሉስ

ውዳ̣ሴሃ : ለእግ̮ዝእትነ : ማርያም : ድን̮ግል : ወላዲተ አም̮ላክ : ዘይትነበ̣ብ : በዕለተ ዘሠሉስ :

አክ̮ሊለ ምክ̮ሕነ ፡ ወቀዳሚተ መድ̮ኃኒትነ ፡ ወመሠረተ ንጽ̮ሕነ ፡ ኮነ ፡ በማርያም ፡ ድን̮ግል ፡ እን̮ተ ወለደት ፡ ለነ ፡ ዘእግ̮ዚአብሔር ፡ ቃለ ፡ ዘኮነ ፡ ሰብ̮አ ፡ በእን̮ተ መድ̮ኃኒትነ ፡ እም̮ድኅ̮ረ ኮነ ፡ ሰብ̮አ ፡ ጥዩ̣ቀ ፡ አም̮ላክ ፡ ፍጹ̣ም ፡ ውእቱ ፡ ወበእን̮ተዝ ፡ ወለደቶ̣ ፡ እን̮ዘ ድን̮ግል ፡ ይእቲ ፡ መንክር ፡ ኃይለ ወሊዶታ ፡ ዘኢይ̣ትነገ̣ር ፡ ሰአሊ ፡ ለነ ፡ ቅድ̣ስ̮ት ፡፡

እስ̮መ በፈቃዱ ፡ ወበሥም̮ረተ አቡሁ ፡ ወመን̮ፈስ ቅዱ̣ስ ፡ መጽ̮አ ፡ ወአድ̮ኀነ̣ነ ፡ ዐቢይ̣ ፡ ውእቱ ፡ ስብ̮ሐተ ድን̮ግልና̣ኪ ፡ ኦ ፡ ማርያም ፡ ድን̮ግል ፡ ፍጽ̣ምት ፡ ረከብኪ ፡ ሞገሰ ፡ እግ̮ዚአብሔር ፡ ምስ̮ሌኪ ፡ አን̮ቲ ፡ ውእቱ ፡ ሰዋስው ፡ ዘርእ̮የ ፡ ያዕቆብ ፡ እም̣ድር ፡ ዘይበጽ̣ሕ ፡ እስ̮ከ ሰማይ ፡ ወመላእክ̮ተ እግ̮ዚአብሔር ፡ የዐር̣ጉ ፡ ወይወር̣ዱ ፡ ውስ̮ቴታ ፡ ሰአሊ ፡ ለነ ፡ ቅድ̣ስ̮ት ፡፡

አን̮ቲ ፡ ውእቱ ፡ ዕፅ ፡ ዘርእ̮የ ፡ ሙሴ ፡ በነደ̣ እሳት ፡ ወኢትውዒ ፡ ዘውእቱ ፡ ወል̮ደ እግ̮ዚአብሔር ፡ መጽ̮አ ፡ ወኀደረ ፡ ውስ̮ተ ከርሥኪ ፡ ወእሳተ መለኮቱ ፡ ኢያ̣ውዐ̮የ ፡ ሥጋኪ ፡ ሰአሊ ፡ ለነ ፡ ቅድ̣ስ̮ት ፡፡

አን̮ቲ ፡ ውእቱ ፡ ገራህ̮ት ፡ ዘኢተዘር̮ዐ ፡ ውስ̮ቴታ ፡ ዘር̮ዕ ፡ ወጽ̮አ ፡ እምኔ̣ኪ ፡ ፍሬ ሕይ̮ወት ፡ አን̮ቲ ፡ ውእቱ ፡ መዝ̮ገብ ፡ ዘተሣየጠ ፡ ዮሴፍ ፡ ወረከበ ፡ በውስ̮ቴታ ፡ ባሕ̮ረየ ፡ ዕን̮ቈ ፡ ክቡረ ፡ ዘውእቱ ፡ መድ̮ኃኒነ ፡ ኢየ̣ሱስ ፡ ክ̮ርስ̮ቶስ ፡ ተፀውረ ፡ በከር̮ሥኪ ፡ ወወለድ̮ኪዮ̣ ፡ ውስ̮ተ ዓለም ፡ ሰአሊ ፡ ለነ ፡ ቅድ̣ስ̮ት ፡፡

ተፈሥ̣ሒ ፡ ኦ ፡ ወላዲተ እግ̮ዚእ ፡ ሐሤ̣ቶሙ ፡ ለመላእክ̮ት ፡ ተፈሥ̣ሒ ፡ ኦ ፡ ንጽሕ̮ት ፡ ዜናሆሙ ፡ ለነቢያት ፡ ተፈሥ̣ሒ ፡ እስ̮መ ረከብ̮ኪ ፡ ሞገሰ ፡ እግ̮ዚአብሔር ፡ ምስሌኪ ፡ ተፈሥ̣ሒ ፡ እስ̮መ ተወከፍ̮ኪ ፡ ቃሎ ፡ ለመልአ̮ክ ፡ ፍሥ̣ሓ ኵ̣ሉ ፡ ዓለም ፡ ተፈሥ̣ሒ ፡ ኦ ፡ ወላዲተ ፈጣሬ ኵሉ̣ ፡ ዓለም ፡ ሰአሊ ፡ ለነ ፡ ቅድ̣ስ̮ት ፡፡

ተፈሥ̣ሒ ፡ እስ̮መ ድል̣ወ ፡ ተሰመይ̮ኪ ፡ ኦ ፡ ወላዲተ አም̮ላክ ፡ ተፈሥ̣ሒ ፡ ኦ ፡ መድ̮ኃኒታ ፡ ለሔዋን ፡ ተፈሥ̣ሒ ፡ እንተ አጥ̮በውኪ ፡ ሐሊበ ፡ ለዘይሴ̣ስዮ ፡ ለኵሉ̣ ፡ ፍጥ̮ረት ፡ ተፈሥ̣ሒ ፡ ኦ ፡ ቅድ̣ስ̮ት ፡ እሞ̣ሙ ፡ ለኵሎ̣ሙ ፡ ሕያዋን ፡ ናንቃዐዱ̣ ፡ ኀቤኪ ፡ ትስ̮አሊ ፡ በእን̮ቲአነ ፡ ሰአሊ ፡ ለነ ፡ ቅድ̣ስ̮ት ፡፡

ኦ ፡ ድን̮ግል ፡ ኦ ፡ ቅድ̣ስ̮ት ፡ ኦ ፡ ወላዲተ እግ̮ዚእ ፡ እስ̮መ ወለድ̮ኪ ፡ ለነ ፡ ንጉሠ ፡ መን̮ክር ፡ ምሥ̮ጢር ፡ ኀደረ ፡ ላዕ̮ሌኪ ፡ ለመድ̮ኃኒተ ዚአነ ፡ ናር̮ምም ፡ እስ̮መ ኢንክ̮ል ፡ ፈጽ̣ሞ ፡ ጥን̮ቁቀ ፡ ነጊረ ፡ በእን̮ተ ዕበዩ ፡ ለውእቱ ፡ ገባሬ ሠና̣ያት ፡ በብዙኅ ፡ መን̮ክር ፡ ራእይ ፡ ሰአሊ ፡ ለነ ፡ ቅድ̣ስ̮ት ፡፡

ቃለ አብ ፡ ሕያው ፡ ዘወረደ ፡ ውስ̮ተ ደብ̮ረ ሲና ፡ ወወሀበ ፡ ሕገ̣ ፡ ለሙሴ ፡ ወከደነ ፡ ርእ̮ሰ ደብ̮ር ፡ በጊሜ ፡ ወጢስ ፡ በጽል̮መት ፡ ወነፋስ ፡ ወበድም̮ፀ ቃለ አቅርንት ፡ ይጌሥ̣ፅ ፡ ለእለ̣ ይቀው̣ሙ ፡ በፍር̮ሀት ፡ ሰአሊ ፡ ለነ ፡ ቅድ̣ስ̮ት ፡፡

ውእቱኬ ፡ ዘወረደ ፡ ኀቤኪ ፡ ኦ ፡ ደብ̮ር ፡ ነባቢት ፡ በትሕ̮ት̣ና ፡ መፍ̮ቀሬ ሰብ̮እ ፡ ተሰብ̮አ ፡ እምኔ̣ኪ ፡ ዘእን̮በለ ውላ̣ጤ ፡ ፍጹ̣መ ሥጋ ፡ ነባቢ ፡ ዘከማነ ፡ በመን̮ፈሰ ጥበብ ፡ አም̮ላክ ፡ ኀደረ ፡ ላዕ̮ሌሃ ፡ ኮነ ፡ ፍጹ̣መ ፡ ሰብ̮አ ፡ ከመ ያድ̮ኅኖ̣ ፡ ወይሥ̮ረይ ፡ ኃጢአቶ ፡ ለአዳ̣ም ፡ ወያን̮ብሮ̣ ፡ ውስ̮ተ ሰማያት ፡ ወያግ̮ብኦ ፡ ኀበ ዘትካት ፡ መን̮በሩ ፡ በዕበየ ሣህ̮ሉ ፡ ወምሕ̮ረቱ ፡ ሰአሊ ፡ ለነ ፡ ቅድ̣ስ̮ት ፡፡

ዕበያ ፡ ለድን̮ግል ፡ ኢይ̣ት̮ከሀል ፡ ለተነግ̮ሮ ፡ እስ̮መ እግ̮ዚእ ፡ ኀረያ ፡ መጽ̮አ ፡ ወኀደረ ፡ ላዕ̮ሌሃ ፡ ዘየኀድ̣ር ፡ ውስ̮ተ ብር̮ሃን ፡ ኀበ አል̮ቦ ፡ ዘይቀር̣ቦ ፡ ተፀው̮ረ ፡ በከር̮ሣ ፡ ተሥ̮ዓተ̣ ፡ አው̮ራኀ ፡ ዘኢይ̣ት̮ረአይ ፡ ወዘኢይ̣ት̮ዐወ̣ቅ ፡ ወለደቶ̣ ፡ ማርያም ፡ እን̮ዘ ድን̮ግል ፡ ይእቲ ፡ ሰአሊ ፡ ለነ ፡ ቅድ̣ስ̮ት ፡፡

ዘውእቱ ፡ እብ̮ን ፡ ዘርእ̮የ ፡ ዳንኤል ፡ ነቢይ̣ ፡ ዘተበት̮ከ ፡ እም̮ደብ̮ር ፡ ነዋ̣ኅ ፡ ዘእን̮በለ እድ ፡ ዘውእቱ ፡ ቃል ፡ ዘወፅ̮አ ፡ እም̮ኀበ አብ ፡ መጽ̮አ ፡ ወተሰብ̮አ ፡ እም̮ድን̮ግል ፡ ዘእን̮በለ ዘር̮ዐ ብእሲ ፡ ወአድ̮ኀነነ̣ ፡ ሰአሊ ፡ ለነ ፡ ቅድ̣ስ̮ት ፡፡

ኮን̮ኪ ፡ አጽ̮ቀ ፡ ንጹሐ ፡ ወሙዳየ አሚን ፡ ርትዕ̮ት ፡ ሃይ̮ማኖቶሙ ፡ ለቅዱ̣ሳን ፡ አበዊነ ፡ ኦ ፡ ንጽሕ̮ት ፡ ወላዲተ አም̮ላክ ፡ ድን̮ግል ፡ ኅትም̮ት ፡ ወለድ̮ኪ ፡ ለነ ፡ ቃለ አብ ፡ ኢየ̣ሱስ ፡ ክ̮ርስ̮ቶስ ፡ መጽ̮አ ፡ ለመድ̮ኃኒትነ ፡ ሰአሊ ፡ ለነ ፡ ቅድ̣ስ̮ት ፡፡

አን̮ቲ ፡ እሙ̣ ፡ ለብር̮ሃን ፡ ክብር̮ት ፡ ወላዲተ እግ̮ዚእ ፡ እን̮ተ ፆርኪዮ̣ ፡ ለቃል ፡ ዘኢይ̣ት̮ረአይ ፡ እም̮ድኅረ ወለድ̮ኪ ፡ ኪያሁ ፡ ነበር̮ኪ ፡ በድን̮ግል̣ና ፡ በስብ̮ሐት ፡ ወበባርኮት ፡ ያዐብ̣ዩኪ ፡ ሰአሊ ፡ ለነ ፡ ቅድ̣ስ̮ት ፡፡

አይ ፡ ልሳ̣ን ፡ ዘይክ̮ል ፡ ነቢበ ፡ ዘይት̮ነገ̣ር ፡ በእን̮ቲአኪ ፡ ኦ ፡ ድን̮ግል ፡ ንጽሕ̮ት ፡ እሙ̣ ፡ ለቃለ አብ ፡ ኮን̮ኪ ፡ መን̮በሮ ፡ ለንጉሥ ፡ ለዘይፀው̣ርዎ̣ ፡ ኪሩቤል ፡ ናስ̮ተበፅ̣ዐኪ̣ ፡ ኦ ፡ ቡርክት ፡ ወንዘክ̣ር ፡ ስመኪ ፡ በኵሉ̣ ፡ ትው̮ልደ̣ ትው̮ልድ̣ ፡ ኦ ፡ ርግ̮ብ ፡ ሠናይ̮ት ፡ እሙ̣ ፡ ለእግ̮ዚእነ ፡ ኢየ̣ሱስ ፡ ክ̮ርስ̮ቶስ ፡ ሰአሊ ፡ ለነ ፡ ቅድ̣ስ̮ት ፡፡

ተፈሥ̣ሒ ፡ ኦ ፡ ማርያም ፡ እም̣ ፡ ወአመት ፡ እስ̮መ ለዘውስ̮ተ ሕፅ̮ንኪ ፡ ይሴብ̣ሕዎ̣ ፡ መላእክ̮ት ፡ ወኪሩቤል ፡ ይሰግ̣ዱ ፡ ሎቱ̣ ፡ በፍር̮ሀት ፡ ወሱራፌል ፡ ዘእን̮በለ ፅር̮አት ፡ ይሰፍ̣ሑ ፡ ክነፊሆሙ ፡ ወይብ̮ሉ ፡ ዝን̮ቱ ፡ ውእቱ ፡ ንጉሠ ስብ̮ሐት ፡ መጽ̮አ ፡ ይሥ̮ረይ ፡ ኃጢአተ ዓለም ፡ በዕበየ ሣህ̮ሉ ፡ ሰአሊ ፡ ለነ ፡ ቅድ̣ስ̮ት ፡፡