ውዳሴ ማርያም ፡ ዘሰኑይ

ውዳ̣ሴሃ ፡ ለእግ̮ዝእትነ ፡ ማርያም ፡ ድን̮ግል ፡ ወላዲተ አም̮ላክ ፡ ዘይት̮ነበ̣ብ ፡ በዕለተ ሰኑይ ።

ፈቀደ ፡ እግ̮ዚእ ፡ ያግ̮ዕዞ̣ ፡ ለአዳ̣ም ፡ ሕዙነ ፡ ወትኩ̣ዘ ልብ ፡ ወያግ̮ብኦ ፡ ኀበ ዘትካት ፡ መን̮በሩ ፡ ሰአሊ ፡ ለነ ፡ ቅድ̣ስ̮ት ።

ሠረቀ ፡ በሥጋ ፡ እም̮ድን̮ግል ፡ ዘእን̮በለ ዘር̮ዐ ብእሲ ፡ ወአድ̮ኀነ̣ነ ፡ ለሔዋን ፡ እን̮ተ አስ̮ሐታ ፡ ከይ̮ሲ ፡ ፈት̮ሐ ፡ ላዕ̮ሌሃ ፡ እግ̮ዚአብሔር ፡ እን̮ዘ ይብ̮ል ፡ ብዙኀ ፡ አበዝ̣ኆ ፡ ለሕማምኪ ፡ ወለጻዕ̮ርኪ ፡ ሠም̮ረ ፡ ልቡ̣ ፡ ኀበ ፍቅ̮ረ ሰብ̮እ ፡ ወአግዐዛ ፡ ሰአሊ ፡ ለነ ፡ ቅድ̣ስ̮ት ።

ኢየ̣ሱስ ፡ ክ̮ርስ̮ቶስ ፡ ቃል ፡ ዘተሰብ̮አ ፡ ወኀደረ ፡ ላዕ̮ሌነ ፡ ወርኢነ ፡ ስብ̮ሐቲሁ ፡ ከመ ስብ̮ሐተ አሐዱ ፡ ዋሕድ ፡ ለአቡሁ ፡ ሠም̮ረ ፡ ይሣ̣ሃለነ ፡ ሰአሊ ፡ ለነ ፡ ቅድ̣ስ̮ት ።

ርእ̮የ ፡ ኢሳይ̣ያስ ፡ ነቢ̣ይ ፡ በመን̮ፈሰ ትን̮ቢት ፡ ምሥ̮ጢሮ ፡ ለአማኑኤል ፡ ወበእን̮ተዝ ፡ ጸር̮ሐ ፡ እን̮ዘ ይብ̮ል ፡ ሕፃን ፡ ተወል̮ደ ፡ ለነ ፡ ወል̮ድ ፡ ተውህ̮በ ፡ ለነ ፡ ሰአሊ ፡ ለነ ፡ ቅድ̣ስ̮ት ።

ተፈሣ̣ሕ ፡ ወተሐሠይ ፡ ኦ ፡ ዘመደ ዕጓለ እመሕያው ፡ እስ̮መ አፍቀሮ ፡ እግ̮ዚአብሔር ፡ ለዓለም ፡ ወመጠ̣ወ ፡ ወል̮ዶ ፡ ዋሕደ ፡ ከመ ይሕ̮የው ፡ ኲሉ̣ ፡ ዘየአም̣ን ፡ ቦቱ̣ ፡ እስ̮ከ ለዓለም ፡ ፈነ̣ወ ፡ ለነ ፡ መዝ̮ራዕቶ ፡ ልዑለ ፡ ሰአሊ ፡ ለነ ፡ ቅድ̣ስ̮ት ።

ዘሀሎ̣ ፡ ወይሄሉ̣ ፡ ዘመጽ̮አ ፡ ወካእ̮በ ፡ ይመጽ̣እ ፡ ኢየ̣ሱስ ፡ ክ̮ርስ̮ቶስ ፡ ቃል ፡ ዘተሰብ̮አ ፡ እምኔ̣ኪ ፡ ዘእን̮በለ ውላ̣ጤ ፡ ኮነ ፡ ፍጹ̣መ ፡ ሰብ̮አ ፡ ኢተበዐደ ፡ ወኢተፈል̮ጠ ፡ በኩሉ̣ ፡ ግብ̮ሩ ፡ ወል̮ድ ፡ ዋሕድ ፡ አላ̣ ፡ አሐዱ ፡ ራእይ ፡ ወአሐዱ ፡ ሕላ̣ዌ ፡ ወአሐዱ ፡ መለኮት ፡ ዘእግ̮ዚአብሔር ፡ ቃል ፡ ሰአሊ ፡ ለነ ፡ ቅድ̣ስ̮ት ።

ተፈ̣ሥሒ ፡ ኦ ፡ ቤተ ልሔም ፡ ሀገሮሙ ፡ ለነቢያት ፡ እስ̮መ በኀቤኪ : ተወል̮ደ ፡ ክ̮ርስ̮ቶስ ፡ ዳግማይ ፡ አዳ̣ም ፡ ከመ ያግ̮ብኦ ፡ ለአዳ̣ም ፡ቀዳሚ ፡ ብእሲ ፡ እም̣ድ̮ር ፡ ውስ̮ተ ገነ̣ት ፡ ይስ̮ዐር ፡ ፍት̮ሐ ሞት ፡ ኦ ፡ አዳ̣ም ፡ መሬት ፡ አን̮ተ ፡ ወትገብ̣እ ፡ ውስ̮ተ መሬት ፡ ኀበ ሀለ̣ወት ፡ ብዝኅ̮ት ፡ ኃጢአት ፡ በህየ̣ ፡ ትበዝ̣ሕ ፡ ጸጋ̣ እግ̮ዚአብሔር ፡ ሰአሊ ፡ ለነ ፡ ቅድ̣ስ̮ት ።

ትትፌሣ̣ሕ ፡ ወትት̮ሐሠ̣ይ ፡ ኲሉ̣ ፡ ነፍስ̮ተ ሰብ̮እ ፡ ምስ̮ለ መላእክ̮ት ፡ ይሴ̣ብሕዎ̣ ፡ ለክ̮ርስ̮ቶስ ፡ ንጉሥ ፡ ይጸር̣ሑ ፡ ወይብ̮ሉ ፡ ስብ̮ሐት ፡ ለእግ̮ዚአብሔር ፡ በሰማያት ፡ ወሰላም ፡ በምድ̮ር ፡ ሥም̮ረቱ ፡ ለሰብ̮እ ፡ እስ̮መ ሠዐረ ፡ ዘትካት ፡ ወነሠተ ፡ ምክ̮ሮ ፡ ለጸላዒ ፡ ወሠጠጠ ፡ መጽ̮ሐፈ ዕዳሆሙ ፡ ለአዳ̣ም ፡ ወለሔዋን ፡ ወረሰ̣ዮሙ ፡ አግ̮ዓዝያነ ፡ ዘተወል̮ደ ፡ ለነ ፡ በሀገረ ዳዊት ፡ መድ̮ኃኒነ ፡ ኢየ̣ሱስ ፡ ክ̮ርስ̮ቶስ ፡ ሰአሊ ፡ ለነ ፡ ቅድ̣ስ̮ት ።

ብር̮ሃን ፡ ዘበአማን ፡ ዘያበር̣ህ ፡ ለኲሉ̣ ፡ ሰብ̮እ ፡ ለእለ̣ ይነብ̣ሩ ፡ ውስ̮ተ ዓለም ፡ በእን̮ተ ፍቅ̮ረ ሰብ̮እ ፡ መጻእ̮ከ ፡ ውስ̮ተ ዓለም ፡ ወኲሉ̣ ፡ ፍጥ̮ረት ፡ ተፈሥ̣ሐ ፡ በምጽ̮አትከ ፡ እስ̮መ አድ̮ኀንኮ ፡ ለአዳ̣ም ፡ እም̮ስሕተት ፡ ወረሰ̣ይ̮ካ ፡ ለሔዋን ፡ አግ̮ዓዚተ ፡ እም̮ጻዕ̮ረ ሞት ፡ ወወሀብ̮ከነ ፡ መን̮ፈሰ ልደት ፡ ባረክ̮ናከ ፡ ምስ̮ለ መላእክ̮ቲከ ፡ ሰአሊ ፡ ለነ ፡ ቅድ̣ስ̮ት ።